Magpakatatag!! ito ang sigaw ng mga
tao na may ipinaglalaban at nakatingin sa inaasahan nilang gantimpala sa
darating na wakas.
Pamula pa man noong unang mga panahon, ang
lipi ni Jacob sa pamumuno ni Josue ay pinaalalahanan ng Panginoon na maging
malakas, magpakatatag at magpakatapang hanggang sa maabot nila ang lupang
ipinangako. Hindi man naging madali sa mga israelita ang kanilang naging
pakikibaka, nakita naman natin ang probidensya at biyaya ng Diyos upang maabot
nila ang pangako sa kanilang lupain, hindi lamang sa buhay ni Josue, pati sa
mga tauhan ng Bibliya, hanggang sa mga kristiyano ng modernong kapanahunan ay
ipinagkakatubilin sa atin na magpakatatag sa paglakad sa buhay na ito.
Ang
isang iglesya ay maituturing na matatag hindi dahil libu-libo ang mga miyembro
nito, maging hindi rin sa laki ng istraktura ng kanilang bahay sambahan,at sa
dami ng kanilang kabang yaman. Ang isang matatag na iglesya ay hindi ang
iglesya na walang anumang problema, sagabal at pagsubok. Ang isang matatag na
iglesya ay hindi ang iglesya na wala nang anumang alalahanin. Maaaring
maranasan ng isang iglesya ang ilan sa mga mabubuting bagay na ito subalit ang
isang iglesya ay matatag at mananatiling matatag kapag ang Panginoong
Hesu-Kristo ang Sentro ng anumang Gawain nito at Ang Pangalan ng Diyos ang
natatas sa kanilang kalagitnaan.
Ang magpakatatag ay isang hamon na posibleng
maisakatuparan. Ang Bibliya, na salita ng Diyos ay patuloy na nagpapaalala satin ng mga bagay na dapat nating gawin upang makapamuhay ng maayos, isa pa hindi nawawalan ng kapangyarihan ang salita ng Diyos upang magbigay ng gabay, kaparaanan, at lakas upang ikaw ay makapagpatuloy na mamuuhay ng may katatagan. Ang problema, kalimitan sa isang tao ay inaakala niya na siya ay malakas na ng malayo sa patnubay ng Bibliya, ang hindi niya namamalayan na ang laks na meron siya na galing sa kanyang sariling talino at kakayahan ay madaling lumilipas at nagdadala ng kabiguan. Alalahanin natin na ang mga israelita, ang mga tao ng Bibliya, ang mga hinirang ng Diyos ay hindi nagiging matagumpay ng malayo sa pag-gabay at salita ng Diyos.
Ang magpakatatag ay isang hamon na posibleng maisakatuparan sapagkat may pangako ang Panginoon na kung siya ang nagsimula
ng mabuting gawa sa iyo ay lulubusin nya ito hanggang sa wakas at ang Biyaya ng
Diyos ay maasahan natin na tapat sa panahon ng ating kahinaan. Lubos tayo na
magtiwala sa ating Panginoon na may kakayahan na magdala sa atin sa parada ng
tagumpay.
Sa Diyos lamang ang papuri ngayon at
magpakailanman!!!
